Gaur aurkeztuko ditu Hernaniko EH Bilduk, legegintzaldi berrirako osatu duen Herri Programa eta hautagaien zerrenda. Batzar irekia antolatu du iluntzeko 19:30etan, Biterin. Bertaratuek bozkatuko dituzte, alderdiak proposatutako programa eta zerrendagaiak: «batzar honen bitartez, militantziaren onarpena bilatuko da», azaldu dute.
Herri Programa aurkeztuko dute aurrena. Puntuz Puntu dinamikarekin osatu dute, azken hilabeteotan, eta bertan jaso ditu EH Bilduk datorren legegintzaldirako erronkak. Nabarmendu dute, 200 herritar inguruk hartu dutela parte, eta 22 arlo aztertu direla.
Erronkei aurre egiteko taldea
Ondoren, Hernaniko EH Bilduk osatu duen lantaldea emango dute aditzera, «Luis Intxauspe alkategaiari lagunduko diona legegintzaldi berriaren erronkei aurre egiteko». Zerrenda ere bozkatuko dute bertaratuek.
«Herritarron parte hartzea ezinbestekoa da»
EH Bilduk nabarmendu du, herritarren parte hartzearekin «Hernani hobetzen jarraitzeko» programa osatu duela: «guzti hau martxan jartzeko, beti bezala, herritarron parte hartzea ezinbestekoa da; eta horregatik, hernaniar guztiak gonbidatu nahi ditugu batzar irekira».
Jakinarazi dute, nahi duenak aurrez eskatu dezakeela Herri Programaren zirriborroa, hernani@ehbildu.net helbidera idatzita.