Atzo aurkeztu zuten, modu ofizialean, Beterriko 6 udalerriei zerbitzua emango dien Garapen Integralerako Agentzia (Florida 28). «Juridikoki ez da sortu oraindik», azaldu zuten; «ez da posible izan interes politiko batzuk medio, baina horiek ezin dira gizartearen interesen gainetik egon». Horregatik, nabarmendu zuten beste guztia egina dagoela: «proiektu eta egitasmoak martxan daude, eta eraikin honekin beste pauso bat eman dugu». Etorkizunean beste herrietan ere gune gehiago sortzeko asmoa ere azaldu zuten.
Aurkezpenean izan ziren Hernani, Astigarraga, Lasarte-Oria, Andoain eta Usurbilgo alkateak, eta Gipuzkoako Foru Aldundiko Berrikuntza, Landa Garapena eta Turismo diputatua, Jon Peli Uriguen.
Luis Intxauspe Hernaniko alkateak azaldu zuen «pertsona ardatz izango duen garapen eredua» jarri dela martxan. «2014an, 2 milioi euro bideratu ziren langabetuak kontratatu eta lanpostuak sortzeko enpresak laguntzera. Dagoeneko, 600 enpresa txiki eta ertainekin ari gara lanean, 240 enpresa berri sortu dira, eta 300dik gora lanpostu», Hain zuzen, martxan dauden bi egitasmo azpimarratu zituen: Innoforo eta Kooperatzen.