Buruntzaldeako EAJko ordezkariek agerraldia egin zuten atzo Astigarragan. Azaldu zutenez, agerraldiaren helburua zen EH Bilduk garapen agentziaren inguruan esandakoak gezurtatzea: «Garapen Agentzia ez da eratu, ez dago martxan. Udalbatzek ez dute agentzia eratzea onartu. Bildu herritarrak eta enpresak nahasi nahian dabil». EAJren esanetan, EH Bilduk dio eskualdeko agentzia eratua dagoela eta forma juridikoa zehaztea bakarrik falta dela: «Bilduk horri etekin politikoa ateratzeko esaten du. Agentzia eratzea udalbatzen eskumena da, eta eskualdeko sei herrietatik batek berak ez du erabaki hori hartu».
«Gaia hiru herritan bakarrik eztabaidatu dute»
EAJko ordezkarien esanetan, gaia Hernani, Astigarraga eta Usurbilen bakarrik eztabaidatu da: «hau da, ezker abertzaleak gehiengo absolutua daukan herrietan. Hiru kasuetan, erakundeak izango lituzkeen estatutuak bakarrik onartu dira, beraz, ez da erakundearen sorrera inondik inora onartu».
Agerraldian azaldu zutenez, arazoa konpontzeke dago: «hiru herriak aldebakartasunetik aurrera egitea erabakiko balute ere, arazoa konpontzeke dago. Garbitaniarekin egin zuten bezala, gardentasun ezaren ildotik lan egiten jarraituko balute ere, Urnieta, Lasarte-Oria eta Andoain ez lirateke erakunde berrian sartuko, ezker abertzaleak ez baitu gehiengorik herri hauetan. Andoinek beste arazo bat ere badu; izan ere, zor haundi bat bat dauka, eta ezin da gisa honetako erakunde batean sartu».
«Orain urte asko sinatutako lankidetza akordioak erabili dituzte eratua dagoela esateko»
EAJk dionez, Agentzia ez da eratu: «zer saldu nahi du bilduk? Agentzia ez da eratu, eta ezingo da egin, baldin eta koalizioak atzera egin eta gainerako alderdien adostasuna bilatzen ez badu. Bildu gezurretan ari zaie herritar eta enpresei».
Bestalde, EAJk azaldu zuen, eskualdeko sei herriek lankidetza akordioak sinatu zituztela duela urte asko: «proiektu mordoa egin ditugu elkarlanean turismoa, enplegua eta merkaritza sustatzeko, besteak beste. Akordio horiek erabili ditu Bilduk agentzia eratua dagoela iragartzeko».
EAJk kritikatu zuen EH Bilduk etekin politikoa atera nahi duela: «mozioa aurkeztuko dugu Buruntzaldeako udaletan, agentzia eratu dela gezurtatzeko, eta Bilduri eskatuko diogu Udalen erabakitze organoak errespetatzea. Atzera egiteko eskatuko diogu».
Bukatzeko, jakinarazi zuten lanean jarraitzeko asmoa dutela: «Buruntzaldearako proposamen parte hartzailea eta bateratzailea egin nahi dugu. Datozen asteetan aurkeztuko dugu».