Hasieratik izandako arrakasta ikusita, eta lehengo urteko etenaldiaren ondoren, berriro ere martxan da Hernaniko X. Txistulari Jaialdia. 2005ean hasi zuen ibilbidea jaialdi honek, eta urtetik urtera Euskal Herri osoko txistulari gehiago animatu dira parte hartzera.
Larunbatean, Txistulari Gazteen Txapelketa egingo da, eta igandean, Txistulari Topaketa.
Hernaniko bi bakarlari eta bi talde, txapelketan
Larunbat goizean, Txistulari Gazteen X. Txapelketa egingo da. Azken edizion, 2013an, ez zen saririk gelditu Hernanin; Gorka Pagonabarraga durangarra, Beñat Vicario antiguotarra, eta Binako talde donostiarra izan ziren garaile. Aurten, auskalo! Aukerarik, behintzat, ez da faltako.
Goizeko 11:00etan hasiko da txapelketa, Milagrosan. A kategorian, 12 urtetik beherakoan, 8 lagun ariko dira, Abadiño, Azpeitia, Donostia, Leitza eta Oriotik etorriak. Hernaniarrik ere izango da; Manex Zabaleta.
B kategorian, berriz, 13-16 urte artekoenean, 13 lagun ariko dira, Atarrabia, Azpeitia, Donostia, Durango, Gasteiz, Iruñea, Orio eta Tafallakoak. Hernaniko partehartzailea, berriz, Ane Telletxea izango da.
Arratsaldeko 17:00etan, taldeen txanda hasiko da. Guztira, 5 ariko dira; Azpeitia eta Iruñeakoak, eta Hernaniko bi: Akola eta Txilibita taldeak. Sari banaketa 18:00ak aldera izango da.
Igandean, jai-giroa
Jaialdiarekin jarraitzeko, Txistulari Topaketa egingo da igandean. Goizeko 10:00etan diana joko dute txistulariek herrian barrena. Eguerdiko 12:30etan, kalejira eta Ttun-ttuna izango dira, Plazan, eta ondoren, Santa Barbara elkartean bazkalduko dute.