Euskal preso politikoen senideei laguntza eskaintzen dien gidari taldea da Mirentxin; hilero kartzeletara eramaten dituzte senideak, presoak bisitatzera. Horrek hainbat gastu eragiten ditu: furgonetak erosi eta errebisatu beharra, asegurua, kilometrajea... Horregatik, Hernaniko 3 orduak jaialdia antolatu dute gaurko, ekimenerako babesa lortzeko.
Arratsaldeko 17:30etan hasiko da jaialdia, kiroldegiko frontoian. Sarrerak 10 eurotan daude salgai, Oindi, Aralar, Garin eta Rioja tabernetan.
«Guztiz injustoa da euskal preso politikoen senideek jasaten duten egoera»
Mirentxinek badaramazki urte batzuk euskal preso politikoen senideei laguntza ematen, eta jarraitzeko asmoa azaldu dute: «gaur, inoiz baino beharrezkoagoa ikusten dugu laguntza honekin jarraitzea».
Era berean, azaldu dute egoera injustoa dela. «Guztiz injustoa da euskal preso politikoen senideek jasaten duten egoera. Beharturik daude astebukaeraro milaka eta milaka kilometro egitera beraien senitarteko edo lagunak ikusteko». Horrexegatik, gidari talde honek laguntza eskaintzen diete, «senideak espetxe ezberdinetara hurbiltzen, horrela, gidari moduan beraien bidaiak xamurragoak izan daitezen».
«Mirentxinek aurrera jarraitzeko, herritarrei gonbidapena luzatzen diegu gaur 17:30etan frontoia bete dezaten».
Bidaia horietan egoeraz jabetu direla diote: «egoera ikusi eta orduan jabetzen gara zer esan nahi duen dispertsioak. Karreteran bizitza jokatzea, ordu luzeetako bidaiak 40 minutuko bisita baterako, umeek horrelako bidaiak jasatea, aiton-amona 10 orduz furgoneta batean sartzea... Ze zentzu dauka honek guztiak? Nork bultzatzen du egoera hau? Guk ez dugu ulertzen, eta euskal gizarteak ere ez».
Laguntzen jarraitzeko, gaur denak frontoira
Hori guztia dela eta, Mirentxinek jarraitzeko asmoa azaldu du. Baina, «Mirentxinek aurrera jarraitzeko, herritarrei gonbidapena luzatzen diegu gaur 17:30etan frontoia bete dezaten».
Izan ere, dirua behar dute bidaiek eragiten dituzten gastuei aurre egiteko. «Hilabetean lau bidaia egiten ditugu: Cordoba, Alama, Murtzia eta Alamara, berriro. Hilabetan 7.600km; urtean, 91.200km. 13.200 euroko gastua urteko, bidaietan».
HERNANIKO 3 ORDUAK
Aizkolari desafioa
Olasagasti vs. Esnal eta Larrañaga.
Harrijasotzaile desafioa
Haimar Irigoien vs. Telleria eta Idoia Etxeberriaren erakustaldia.
Bideo emanaldia
Sokatira errebantxa
Hernaniko Gazteak vs. ‘Helduak’
Pelota partidua
Mikel Goñi-Juantxo Koka vs. Ojuel-Azpitarte
Bertsotan
Unai Gaztelumendi eta Eli Pagola.
Aurkezleak
Joxe Felipe Auzmendi eta Irati Sarasua.
Arratsalde osoan:
Apostuak, barra eta giro ezinhobea.