Uraren Nazioarteko Eguna da biharkoa, eta Udalak prentsa ohar bidez adierazi du azken 4 urteetan zein konponketa eta berrikuntza egin dituen, Hernaniko ur sarea berritu eta ur kontsumoan aurrezteko.
353.578 euroko inbertsioa, eta %23ko kontsumo jaitsiera
Guztira, 353.578 euroko inbertsioa egin du azken 4 urteetan, %38an Gipuzkoako Foru Aldundiak lagunduta. Horrekin, ur hoditeria berritu da, ur sarearen nondik-norakoa ezagutzeko; ur sarea sektorizatu eta informatizatu da; eta ur ihesak edo isuriak detektatu eta konpontzeko 1.708 kontagailu berri jarri dira.
Horri esker, aurreztu egin dela azaldu du Udalak. «2011n ur hornidura sarearen eskaera 1.913.130 m3-koa izatetik, 2014an 1.462.640 m3-koa izatera pasa da; %23ko jaitsiera izan da. Honek herriari eta ingurumenari sekulako hobekuntza ekarri dio. Ekonomikoki ere aurreztea ekarri du, 2014an, 2011n baino 145.000 euro gutxiago ordaindu baitzaio Añarbeko Uraki».
«2014an, 2011n baino 145.000 euro gutxiago ordaindu zaio Añarbeko Uraki»
Era berean, eskerrak eman dizkie teknikari eta herritarrei. «Guztion artean, sarearen eraginkortasuna eta kalitatea bermatu da, emaitza izugarri onak lortuz, askotan ezkutukoa den eguneroko lan honi esker, ezagupen haundiko teknikarien elkarlanari esker, herritarren pazientziari esker eta inbertsioari esker».
«Ur isurien aurkikuntzek instalazioaren errendimendua hobetu dute»
Azken lau urteetako lanei esker lortu da aurreztea, Udalaren esanetan. «Egindako ekintza hauekin, izugarri haunditu da ur sarearen errendimendua. Izan ere, %65eko errendimendua izatetik, %85era pasa da. Nahiz eta Hernani haunditu eta abonatu gehiago egon, ur isurien aurkikuntzek instalazioaren errendimendua haunditu dute, ur ez kontrolatua asko jaitsiz, eta aurrezpen izugarriak lortu dira».
Gaur egun Hernaniko ur hornidura sareari lotuta 7.168 abonatu daude, eta banatze-irakurketa ekipazioaren kudeaketa eta mantenua Udalak egiten ditu. Hernaniarrek kontsumitzen duten uraren %95 Añarbeko Urak hornitzen du, eta gainontzekoa Aparrain, Epelerreka eta Aizpitartetik ekarritako urak dira.