Beterriko Garapen Agentzia aurkeztu zuten ostegunean, eskualdeko 5 udalerritako alkateek (tartean, Astigarragako alkateak). Horren harira, prentsa oharra bidali du eskualdeko PSE-EE alderdiak. Sozialistek salatu dute EH Bildu kea saltzen ari dela langabetuak engainatuz, eta exijitzen dio serio jokatzeko eta legea betetzeko, Garapen Agentzia sortzerakoan.
«Ze seriotasun du Bilduk alderdi guztiak kontra dituen txiringito bat martxan jarrita, eskualdeko udalerri guztiak parte izan gabe, izaera juridiko definiturik gabe, edo hainbat udaletxetako idazkari eta kontu-hartzaileen txosten batzuk ilegala dela badiote? Eta nola esan dezakete zintzilik geratu diren gauza batzuk bakarrik direla, oinarrizko kontuak direnean?», diote.
«Hainbat udaletxetako idazkari eta kontu-hartzaileek diote ez duela legea betetzen»
«Figura juridiko egokia, Mankomunitatea da»
Sozialisten esanetan, Eskualdeko Garapen Agentziak ezin du interes partidistarik izan. Hori horrela, erakunde honek hasieratik publikoa eta gardena izan behar duela diote: «Sozialistontzat, figura juridiko egokia Mankomunitatea da. Figura juridiko hori erabiltzen da eskualdeko udaletxeek osatzen duten erakunde publiko gehienetan. Figura juridiko publiko bat, kontrolekin, non Idazkari eta Diruzain karguak udaletxeetako funtzionarioek beteko dituzten jardun publiko eta gardenarekin. Eta ez Bilduk nahi duen bezala, inongo kontrol motarik gabe».
«Penagarria da, erabilera elektoralista»
PSE-EEk gaineratu du, penagarria dela Bilduk «ustezko Garapen Agentziaren sorrerarekin» egiten duen erabilera elektoralista, Udal Hauteskundeetarako bi hilabete falta direla.
Horrez gain, exijitzen diote Bilduri ez ditzala instituzioak nahi bezala erabali: «Lasarte-Oriako eta Urnietako Udalek erakutsi zuten kontrako jarrera Bilduk aurkeztutako estatutuen aurrean. Eta oso harrituta gaude osteguneko prentsaurrekoan Andoaingo alkatea ikusita, Bilduk hasieratik oztopoak jarri baitizkio agentziaren barruan sartzeko».