Astigarragako Herri Eskola haunditzeko lanak aurreko astean hasi ziren eta aurreikusitako epeak betetzen badira, 2016ko otsailean bukatuko dira. Hala ere, 3 ikasgela, irailerako, hau da, 2015-16 ikasturte hasierarako prest egongo dira. Lan hauekin, 6 ikasgela, balio anitzeko areto bat eta jangela bat egingo dira, «Astigarragako Herri Eskolak urte luzeetan salatutako espazio faltaren arazoari ustez irtenbidea emango diona», azaldu du Udalak. Eta gaineratu: «Eskolak espazioa irabaziko du eta gainera, Udalaren beste zerbitzu eta herriko beste elkarteentzako espazio gehiago izango da, kiroldegiko jangela eraikin berrira pasako baita».
Obren eraginez, hainbat eragozpen
Obrek iraun bitartean, hainbat eragozpen sortuko dira: Kamioien sarrera eta irteerak direla eta, Santio bidea itxita egongo da kotxeentzako, lau momentutan: 08:45-09:15; 11:45-12:15; 14:15-14:45; eta 16:15-16:45. Horrez gain, kamioiek kiroldegi eta ikastola arteko pasabidetik egingo dituzte sarrera-irteerak eta ondorioz, pasabide hori itxi egingo da trafikora, bertako bizilagunentzat izan ezik. Obrako garabia (grua) jolastokian jarriko da, eta bizilagunei begira, segurtasun neurri guztiak hartu ditu Udalak. Haurrak ibiltzen diren ingurunea izanda ere, arreta berezia jarriko du Udalak, eta herritarrei ere hala eskatzen die.
Kiroldegi eta ikastola arteko pasabidea itxita egongo da, bertakoentzat izan ezik.
Udala, pozik
Udalak bere poza azaldu du: «Azkenean, Astigarragak merezi duen eskola begi bistan dugu eta kalitatezko hezkuntza publikoa izateko bidean aurrera goaz».
Udalak, egindako esfortzua ekarri du gogora: «Hezkuntzako azpiegituretan inbertsioak egitea Udal eskumena ez bada ere, eskolan zegoen arazoari irtenbideren bat bilatzea ezinbestekoa zen, Eusko Jaurlaritzak 2020ra arte egiteko asmorik ez baitzuen. Udalak 493.290,23 euro jarriko ditu eta Eusko Jaurlaritzak jarriko ditu gainerako 739.920,35 euroak».