San Markos Mankomunitateak bidalitako prentsa oharraren arabera, Atez Ateko sistema erabiltzen duten San Markoseko herriek kendu egin nahi diote Mankomunitateari zaborren gaikako bilketaren konpetentzia.
Hernani, Astigarraga, Lezo, Oiartzun, Pasaia eta Usurbilgo Udalek helegitea jarri zuten San Markosen 2014ko aurrekontuen aurka, «Mankomunitateak ez daukalako gaikako bilketa egiteko konpetentziarik». Hori horrela, puntu horri dagokion aurrekontuaren zatia bertan behera uzteko eskatu zuten.
Mankomunitatearen zerbitzuak eta kontenedoreen sistema mantenduko ditu Denis Itxasok.
Mankomunitateko presidente Denis Itxasoren ustez, «kontenedoreen sistema erabiltzen duten 250.000 hiritar (Donostialdean bizi direnen %80) kaltetuko lirateke horrela». Era berean, azaldu du martxan jarri dituela epaitegietan behar diren instrukzioak, defentsa sendoa egiteko eta bermatzeko Mankomunitatearen zerbitzuak eta kontenedeoreen sistema mantentzea. «Ez dauka zentzurik orain gutxi arte Mankomunitatea gobernatu dutenek esatea orain Mankomunitateak ez daukala konpetentziarik».