Zin egin zuten atzo lau Kofrade berriek, sagardoa defendatu eta honen alde lana egiteko konpromisoa hartu zuten, «beti babestuko dugu edari preziatu hau». Tolare Sagardo Naturalaren Kofradiak XXgarren Kapitulua zuen atzo, eta sagardoaren defentsarako Ohorezko lau Kofrade berri izendatu zituen: Ainhoa Arteta, Maria Jesus Iturbe, Eva Esnaola eta Ozenki abesbatza. Emozioz betetako ekitaldia izan zen, batez ere, lau Ohorezko Kofradeen ibilbidea azaldu zenean. Esker hitzak izan zituzten guztiek, aintzat hartu izanagatik. Euskal Herriko, Espainiako eta Frantziako kofradeak elkartu ziren atzoko ekitaldian, eta Luis Intxauspe alkateak ere izan zituen guztientzako hitzak. Bereziki Tolare kofradiak egiten duen lana goraipatu zuen, eta zorionak eman zizkien Ohorezko Kofrade berriei.