Kultur ekitaldiz gainezka dator larunbata. Plan guztietarako aukera izango da, goizetik hasita.
Bigarren eskuko azoka, Atsegindegin
Txolloak nahi dituztenek aukera ederra izango dute gaur Bigarren Eskuko Azokan. Eguraldi kaxkarra emana dagoenez, Atsegindegin jarriko dituzte postuak, goizeko 10:30etatik eguerdiko 13:00etara. Herritarrek jarriko dituzte postuak, dozenatik gora, eta tartean denetarik izango da: arropa, liburuak, diskak, etxerako tresnak...
Haurrentzako antzerkia, Biterin
Etxeko txikienek ere izango dute zertaz gozatu. Haurrentzako antzerkia antolatu dute Biterin, 11:00etan. Patata tropikala taldearen eskutik, Pirata garrapataren abenturak antzezlanaz gozatzeko aukera izango da. Txotxongiloak, magia eta malabareak tartekatzen dituen obra da, naturaren gaia lantzen duen ikuskizuna.
Kalez kale kantari, eguerdi partea girotzeko
Euskal kantuez girotuko dituzte gaur Kaxkoko kaleak, Kalez Kale Kantariko kideek. Eguerdiko 12:00etan egin dute zita Plaza Berrin, eta handik abiatuta, Kale Nagusia, Andrekale, Karkaba eta Plaza inguruan ibiliko dira. Abestu eta tarte atsegin bat pasa nahi duen guztiari egin diete bertaratzeko gonbitea.
Arratsaldean, dantzan
Erromeria ere izango da gaurkoan. Heiki Hadi taldeak jarriko du saltsa eta martxa Atsegindegin, 18:30etan hasita.