sagarrak more bihurtuko dira eta kaleak beltzez jantziko emakumez beteko dira. Gaua eta jaia danbor hotsez eta feminismoz jantziko dutela azaldu dute Hernaniko Bilgune Feministako kideek. Izan ere, eraso sexistak salatzeko manifestazio-okupazioa deitu dute Hernanin. Gaueko 21:00etan egin dute hitzordua Plazan.
Azaldu dutenez, manifestazioa antolatu dute aske bizi nahi dutelako: «nazkatuta gaude. Eremu guztietan, baita jai giroan ere, aske bizi nahi dugula adierazi nahi dugu. Autodefentsa feministari ekingo diogula zabaldu nahi dugu lau haizetara».
«Gureak diren espazio, giro eta orduak gureganatuko ditugu, hartuko ditugu. Beldurraren monopolioa hautsi egingo dugu, honen jabe eginez»
Okupazioa ere antolatu dute, diotenez, bereak diren espazio, giro eta orduak bereganatzeko: «gureak ere badiren espazio, giro eta orduak (jai giroa, jai guneak eta gaua) gureganatuko ditugu, hartuko ditugu. Beldurraren monopolioa hautsi egingo dugu, honen jabe eginez. Iruñean 2014ko uztailaren 4an aldarrikatu zuten bezala, ez gara konformatuko beldurrez bizitzera eta biktimak izatera. Defentsan badakigu, amorrua adierazten badakigu, eta gaur beldurrak beste leku bat hartuko du».
Emakumeak, protagonista
Azaldu dutenez, emakumeek protagonismoa izango duten manifestazioa izatea nahi dute: «gizonak etor daitezke, baina protagonismoa ez dute beraiek izango, bigarren planoan egongo dira».
Deia, emakumeei
Eraso guztietaz nazkatuta dauden emakume guztiak gonbidatu dituzte manifestaziora: «leku, jatorri eta adin ezberdinetakoei egiten diegu dei, Hernaniko kaleetan barrena amorrua adieraztera».