Eskolako Agenda 21 egitasmoari esker, elikadura jasangarriaren inguruko informazio guztia jasotzen ari dira Hernaniko LH, DBH eta Batxilergoko 2.500 ikasle inguru. Joan den urtean hasitako lanari jarraipena ematen ari dira aurten. Adinari egokituta, diagnostikoa eta ekintzak burutzen ari dira orain.
Lantzeko hainbat modu
Txikienak horma-irudi eta jolasetan oinarritu dira elikadura jasangarria lantzeko. 6 eta 11 urtekoak, atal bat baino gehiago ari dira lantzen: elikadura eta osasuna, elikadura eta sortzen ditugun hondakinak, kontsumo taldeak, kontsumitzeko dauden beste aukerak... Nagusienak berriz, aztertzen ari dira: jakien etiketak, alperrik galtzen den janari kopurua, gosea...
Alkate eta Udal ordezkariekin biltzea, asmoa
Eskola Agenda 21 programa Hernaniko Udalak bultzatzen du eta Artelatz Ingurumen Zerbitzuak aurrera eramaten du. Arduradunek azaldu dutenez, «haur hezkuntzatik hasi eta batxilergo arteko ikasleak aritu dira lanean, herria geroz eta jasangarriagoa bilakatzeko».
Lanketa guztia egin ondoren, Udal ordezkariekin biltzea da helburua: «proiektuaren helmuga da udal ordezkariei eta alkateari aurkeztea landutako guztia. Horretarako entzunaldi berezi bat egiten da. Horrez gain, bakoitzak bere egunerokoan bete beharreko hainbat konpromiso hartzen ditu».