Euskal Herriko Eskubide Sozialen Kartak manifestazioak deitu ditu gaur Bilbon eta Iruñean. Hernaniko LAB eta EH Bilduk bat egin dute deiarekin, eta herritarrak animatu dituzte Bilbora joateko. Bilboko Jesusen Bihotza plazatik aterako da manifestazioetako bat 17:00etan. Hernanitik joateko autobusa antolatu dute 15:00etan, Atsegindegitik. Joan nahi duenak aurrez izena eman behar zuen Garinen edo LABen.
LABek Kronikara bidalitako oharrean dio, manifestazioara joateko deia luzatzen dietela aldaketa sozialaren alde dauden guztiei: «Kartatik 16 puntuko Programa Soziala eratu berri dugu, Euskal Herrian bizi eta lan egiten dugun guztiok aukera izan dezagun berdintasunean oinarritutako bizi baldintza duinak izateko. Instituzioetatik, gaurtik martxan jarri beharreko neurriak dira guztiak. Hori aldarrikatuko dugu gaur. Euskal Herria da euskal herritarron eskubideak bermatzeko subjektu burujabea eta alternatiba hor kokatzen da».