Denok Korrikara kantua osatu dute AEKko irakasle Amaia Ezenarro markinarrak edota Andoni Tolosa, Morau hernaniarrak, besteak beste.
Datorren larunbatean Hernani eta Astigarragatik pasako da Korrika, eta, ondoren, egun osoko festa izango da Astigarragan; tartean, Amaia Ezenarro eta bere taldearen, Dzaust! kontzertua, 22:30ak aldera.
AEKrekin lotura duzuenen artean egin duzue kantua.
Ibilbide luze eta esperientzia handiko musikariak ditugu, batzuk ezagunagoak; besteak musika-munduan auzolan eta aportazio handiak egindakoak. Denok ez gara AEKko langile, baina Korrika sasoian aritzen gara. Besteak euskal munduarekin ere harreman zuzena dutenak dira.
Ekainean hasi ginen, eta ohore bat da niretzat Korrika abestiko ahotsa izan eta horrelako musikoekin parte hartzea.
Zergatik aukeratu dituzue euskal kulturan erreferentzia diren hainbat egile?
Hasieratik AEKren mezua auzolana izan da. Horregatik bertsio bat izatearen aldeko apustua egin zen, eta ze egokiagoa euskaraz argitaratu zen liburuan (Bernat Etxeparerena) agertu zen martxa bat baino? Sautrelaren hitzak gerora ere moldatuak izan dira; Gabriel Arestik lehenengo, eta ondoren Jojok berak. Kantuaren aldaketa zatian Mikel Laboak musikatutako Xalbadorren hitzei egin diegu tokia; egokiena Urepelen hasteko, ezta?
Euskara da kanpora eta guztiok Korrikara. Nahikoa erabiltzen dugu euskera?
Uste dut baietz, ni neu egunero saiatzen naiz, Korrika urtea izan ala ez. Ikasleekin, nire ingurukoekin euskaraz bizi bainaiz, baina hain itsaskorra den lelo batek uste dut horretarako gonbita egiten duela.
AEK barruko kide izanda, zer sentitzen da?
Oilo-ipurdia sentitu izan dut beste urteetan ere. Aurten uste dut haratago doala, nire ahotsa entzutea furgonetako bafleetatik handia izango da. Euskararen alde gau eta egun hainbeste jende korrika eta lanean ikusteak ez du preziorik.
Nola animatuko zenuke jendea euskara erabiltzera?
Badago esaldi bat Amurizarena eta Anje Duhaldek musikatua: maita nazazu gutxiago, goza nazazu gehiago. Mingaina astintzeko esanez, hau ez baita museoko pieza herdoildua!