Mendialdeko agerkari edo plataforma digitala laster aurkeztuko da. Leitzaldea, Baztan, Bertizarana, Bortziriak, Mendialdea, Xareta eta Malerrekako albisteak biltzea da asmoa.
Hasiera batean, bi komunikabidek egin dute bat bertan; Ttipi-ttapa aldizkariak eta Xorroxin irratiak.
Plataforma berria, interneten
Pirinio aldeko komunikabide guztiak batzea da agerkari digital berri honen helburua; www.erran.eus webgunean, hedabide guztiek argitaratzen dituzten albisteak biltzea, hain zuzen. Hala ere, etorkizunera begira irekita dago proiektua. Izan ere, oraingoz Ttipi-ttapa aldizkaria eta Xorroxin irratia bateratu baitira bertan.
Albisteez gain, komunitateak ere izanen du bere tokia: elkarteek, taldeek, eskolek, sindikatuek...
Leitzaldea, Baztan, Bertizarana, Bortziriak, Mendialdea, Xareta eta Malerrekako albisteak biltzea da asmoa.
Aurkezpen ofiziala, martxoaren 23an
Oraindik azken txukunketa lanak egiten ari dira webgunean, eta aurkezpen ofiziala hilaren 23an eginen dute, arratsaldeko 18:00etan Doneztebeko erakusketa gelan. Proiektua finantzatzen lagundu dutenak (Udalbiltza; Garalur, Nafarroako Garapen Agentzia; Tokikom; Topagunea; Eusko Jaurlaritza) izanen dira bertan, eta komunitatea osatzen dutenak eta herritarrak ere gonbidatuta daude.