Egun osoko festa egingo da gaur Astigarragan, Korrika 19 iristen denerako guztia prest edukitzeko eta giroa jartzen hasteko; Txirrindulari martxa, kontzertua, flashmobaren grabaketa, merienda, murala osatzeko argazkiak ateratzea...
Bizikletan buelta, herrian barrena
Eguna hasteko, txirrindulari martxa egingo da, goizeko 11:00etan Joseba Barandiaran plazatik abiatuta. Nahi duten guztiek hartu dezakete parte; bizikletak helioz betetako globoekin apainduko dira, eta ibilbide bat egingo dute Korrika 19ko abestiak girotuta.
Bueltarekin bukatutakoan parte hartzaile guztiekin argazki erraldoi bat aterako da.
Arratsaldean, musika
Korrikan musikak beti izaten du garrantzia. Aurtengo kantua Denok Korrikara izango da, eta arratsaldean flashmoba grabatuko da kantuarekin. Horren aurretik, entsaioa egingo da kiroldegian, 16:15etan.
Gero, kontzertua emango dute Norberto Almandoz musika eskolako Ttakun taldeko kideek; Korrikarekin lotutako kantuak joko dituzte, bereziki, 17:00etan hasita. Jarraian grabatuko da flashmoba, eta 17:30ak inguruan, Xaguxar taldeak antolatuta, merienda banatuko da.
Argazkiak ateratzeko postua, murala osatzeko
Bestalde, arratsaldeko 17:00etan postua jarriko da, argazkiak atera eta Korrika pasatzen den egunerako mural bat osatzeko.
Asteazkenean, Korrika Txikia
Korrika gaur zortzi, hilaren 21ean pasako da Astigarragatik, 11:00ak aldera, eta ondoren, kantu bazkaria egingo da.
Korrika ofizialaren aurretik, ordea, Astigarragako Herri Eskolako ikasleak aterako dira kalera, asteazkenean; bi urtekoak, 11:15etan, eta besteak, 14:45etan.