Beterriko Garapen Integralerako Agentzia martxan dago, eta Hernanin du egoitza, Gabriel Zelaia eraikinean (Florida auzoa, 28). 6 udalerrietako elkarte, enpresa, eragile eta herritarrei ematen die zerbitzua; Hernani, Astigarraga, Urnieta, Lasarte-Oria, Andoain eta Usurbil.
Hala aurkeztu zuten atzo, Hernaniko Orona Fundazioan, 5 udalerritako alkateek: Luis Intxauspe (Hernani), Andoni Gartzia (Astigarraga), Ana Carrere (Andoain), Pablo Barrio (Lasarte-Oria), eta Mertxe Aizpurua (Usurbil).
Bi proiektu martxan
«Sei udalerrietako eragile politikoak ikusten dugu Garapen Agentzia baten beharra. Enkaje juridikoa oraindik ez da lortu, baina bide horretan jarraituko dugu, eta bitartean, proiektuak martxan jarri ditugu», azaldu zuen Luis Intxauspek. Hain zuzen, martxan daude, dagoeneko Innoforo eta Kooperatzen proiektuak. Era berean, beste 6 zerbitzu eskaintzen dira: enplegu zerbitzua, ekintzaile zerbitzua, enpresa zerbitzua, merkataritzaren sustapena, turismoaren sustapena eta sektore sortu berrien edota estrategikoen sustapena.
Aurkezpen irekia, herritarrei
Martxoaren 25ean herritarrentzako aurkezpena egingo da Gabriel Zelaian. Bitartean, informazio gehiago: www.beterri.eus / beterri@beterri.eus / 943 25 63 47.