Txotx denboraldian bete-betean gauden honetan, sagardoak frontoian ere izango du lekua. Atzo aurkeztu zuten Galarretan Sagardoaren Txapelketa. Bosgarren edizioa izango da aurtengoa, eta sei bikoteren artean izango da borroka. Endika Barrenetxea hernaniarrak Matxin III izango du bikote. Gainerakoak dira: Ezkurra-Agirrezabala, Uterga-Olazar, Ezkurra II-Ion, Zeberio II-Endika, eta Etxeberria IV-Etxeberria III.
Bihartik, jokoan
Txapelketaren aurreneko fasean bi talde izango dira. Denek denen kontra jokatuko dute, eta talde bakoitzeko bi onenek egingo dute aurrera. Finalerdietan, talde bakoitzeko onenak, beste taldeko bigarrenaren kontra jokatuko du. Finalerdietako bikote onenek, elkarren kontra jokatuko dute, eta irabazleak lortuko du finalerako pasea. Bi galtzaileek repeska jokatuko dute, eta irabazten duenak finalera pasatzeko aukera izango du. Horretarako, beste finalerako pasea galdu zuen bikotearen kontra jokatuko du.
Txapelketa ostegunean hasiko da, eta ligaxka martxoaren 28a bitartean jokatuko da. Enpaterik balego, bi bikoteen arteko partidua hartuko da kontuan. Bi finalerdiak apirilaren 2an jokatuko dira; eta final haundia apirilaren 25ean.