Desafioz gainezka dator Hernaniko 3 orduak ekimen berria. Mirentxin gidariek antolatu dute, presoen senideak espetxeetara eramateaz arduratzen diren kideek. Arratsalde pasa ederra egiteko aukera jarri dute, datorren larunbatean, hilaren 21ean, Hernaniko pelotalekuan.
Herri kiroletan, onenak
Goi mailako kirolari askok hartuko dute parte 17:30etatik aurrera izango diren desafioetan. Aizkoran, Olasagastik erronka zaila izango du Esnal eta Larrañagaren kontra. Harria jasotzen, Haimar Irigoien eta Telleria ariko dira zein baino zein; erakustaldia berriz, Idoia Etxeberriak emango du. Sokatiran, herritarren artean izango da desafioa: Hernaniko gazteak eta ‘helduak’, aurrez aurre. Pelota partiduan frontoiak betetzen dituzten lau haundi: Mikel Goñi eta Juantxo Koka, Ojuel eta Aizpitarteren kontra. Bertso doinuak Unai Gaztelumendi eta Eli Pagolarenak izango dira. Bideo emanaldia izango da desafioen tartean. Eta apustuak, barra eta giro ona ez dira faltako!
Sarrerak, salgai
Hernaniko 3 orduak ikustera gerturatu, eta Mirentxini lagundu nahi dieten guztiek salgai dituzte sarrerak. 10 euroan erosi daitezke Onddi, Aralar, Garin eta Rioja tabernetan.