Emakumeen Nazioarteko Eguna izango da bihar, eta hainbat ekintza antolatu dituzte Goizuetan eta Aranon, martxoak 8aren bueltan. Bihar bertan izanen dute aurreneko zita goizuetarrek: Emakumeen bazkaria eginen dute elkartean. Irekia izango da, baina bertan bazkaldu nahi dutenek, lehenbailehen eman behar dute izena, Amaia kafetegian.
Datorren igandean, berriz, Loreak filma eskainiko dute. Udaletxeko ganbaran izango da, arratsaldeko 18:00etan.
Aranon, martxoak 18an
Aranon ere jarriko dute Loreak filma. Martxoaren 18an daukate zita aranoarrek, udaletxeko ganbaran, hori ere arratsaldeko 18:00etan.
Bi herrietan, gainera, ikusgai egongo da argazki erakusketa ere, astelehenetik aurrera: Mayar emakumeak. Duintasunezko koloreak. Herrian zehar jarriko dituzte argazkiak, Txiapasetik ekarriak: biziak ehuntzen eta etorkizuna ereiten. Martxoak 30era arte egonen dira. Apirilak 11n izanen dute azkeneko ekintza Goizuetan: Bioenergetika tailerra eginen dute, 10:00etatik 13:00etara. Parte hartzeko aurrez apuntatu behar da, eta dagoeneko zabalik dago izena emateko epea, apirilak 10era arte: 948 51 08 40 telefonora deitu behar da.
Manifestazioa bihar, Iruñean
Beste zita bat ere badute bihar. Manifestazioa eginen dute Iruñean, eguerdiko 12:00etan Gaztelu plazan, martxoak 8ko komisioak antolatuta.