«Egoera normalizatua dago», azaldu zion Luix Intxauspe alkateak Kronikari, atzo. Garbiketa lanak hasi dituzte zenbait puntutan, eta kalteak kirol instalazioetan izan dira soilik: «astelehenean gaude geratuta, Zubipe eta Landareko kalteak baloratzeko. Gainerakoan, Karabelen ez da etxeetara iritsi ura, eta Portun eta industriaguneetan ibaia ez da atera». Bide guztiak zabalik daude.
Ibaia, maila berdean sartzear
Normaltasunera bueltan da Urumea ibaia ere, eta maila berdean sartzear zegoen, erredakzioa ixteko unean: 1,58 metrotan zegoen Ereñotzun, eta pixkanaka doa behera.
Añarben, 45 m3/s ari dira askatzen atzotik, eta gaur espero dute presaren %100era jaistea; uhateak libratzea alegia. Hortik aurrera, erreserba egiten hasiko dira.
Nabarmendu dute, 530 litro jaso direla Añarben otsailean, normalean izaten denaren hirukoitza. Datozen egunetan, ordea, euri gutxi espero da.