Ostegunetik ostiralerako gauean bizi izan zen unerik kritikoena, baina badirudi egoera lasaitu dela, eta urak bere bidera itzuliko direla.
Asteazken eguerdian piztu zen alarma, eta arratsalderako urak hartuta zeuden hainbat toki: Hernanin, Landare, Zubipe, Karabel, Portu eta Karabel auzoen arteko bidea, eta Astigarragarako bidea, AMR parean; Ereñotzun, Fagollaga; Astigarragan, Pelotari kalea eta Txalaka; eta Goizuetan, Olatxo zubia. Ostegun goizerako Arano ere isolatuta gelditu zen, Abaño urak hartu zuelako.
Añarbe zabalik, ostegunean
Gehiago eutsi ezin zionez, Añarbek ateak ireki behar izan zituen ostegun eguerdian, eta ondorioz, ur mailak gora egin zuen, baina ez espero bezainbeste. Hasieran, segunduko 90 metro kubiko askatzen hasi zen, eta ostegunetik ostiralerako gauean hartu zuen urak mailarik altuena; 3,06 metro.
Atzo, pixkanaka emaria gutxitu zuen; arratsaldean segunduko 58 metro kubiko ari zen askatzen, eta Kronikako erredakzioa ixtean, ur maila 2,09 metrotan zegoen, dagoeneko; arriskutik kanpo.
Egoera, normaltasunera
Gaurko, egoera lasaitu egin da, eta garbitzen eta kalteak neurtzen hasi dira.
Uholdeen eraginez errumaniarren kanpamendua hustu behar izan zuten. Hernanin daude, eta astelehenean ikusiko da zer egin.