Asteazkenetik itxita egon da Ereñotzurako bidea, Fagollaga parean, baina atzo arratsalderako ireki zen.
Era berean, urak hartutako bajerak libratu ziren. «Ez da hartainoko galerarik egongo Ereñotzun», azaldu zuen Imanol Lizeaga auzo alkateak, 2011ko uholdeekin gogoratuta. «Garbitzeko kontua izango da dena».
Ur maila, behera
Ostegun eguerdian hartu zuen urak mailarik altuena, Añarbek ateak ireki zituenean. Ondorioz, ura sartu zen Gorrotxategi etxeko bajeran eta Bordatxo merenderoan.
Atzo, ordea, goiz guztian zehar urak behera egin zuen. «Beste lasaitasun bat nabari da», zioen Lizeagak. «Bajeratatik ura atera da, eta ur maila jaitsi da. Fagollagan ere bai».
Latxen ere, arazorik ez
Latxen lur-jausi bat izan zen ostegunean, baina ez zuen oztopo haundirik eragin, eta bidea irekita geratu zen.
Normaltasunera bueltan, baita eskolan ere
Atzo oraindik ere itxita egon zen Txirrita eskola, baina «astelehenean ireki egingo da», azaldu zuen Amaia Minerrek.
«Fagollagan ura gelditzen da, zer edo zer, baina garbitzen ari dira». Arratsalderako irekita zegoen.