Carlos Urquijo Espainiako Gobernu Delegazioaren buruak «instituzioen funtzionamendua baldintzatu» nahi duela salatu dute, Gipuzkoako hainbat Udaletako EH Bilduren 40 alkate eta zinegotzik: «azken hilabeteotan, guk kudeatzen ditugun Udalek sekulako erasoak jasan ditugu Urquijoren partetik», kritikatu zuten, atzo Lasarte-Orian egindako agerraldian.
«Hartzen ditugun neurri eta erabakien kontrako errekurtsoak aurkezten ari da», azaldu dute, «eraso horiek egoera jasangaitza egiten dute, gure eguneroko lana baldintzatuz eta baliabide publikoak prozesu judizialetara bideratzea behartuz». Gaineratu dute, galera hori ez dela Udalentzat bakarrik, «gizartea bera kaltetu dute».
Alkateen batzordea osatuta, egoerari aurre egiteko
Horren aurrean, alkateen batzordea osatzea erabaki dute, zeina harremanetan jarriko den Legebiltzarreko talde politikoekin, «erantzun bateratua gorpuzteko mekanismo politiko eta juridikoak proposatzeko». Halaber, dei egin diote euskal gizarteari, eraso horiei erantzuteko, eta bat egin dute Kontseiluak biharko deitu duen manifestazioarekin: 17:30etan Donostian, Oztopoen gainetik, euskaraz biziko gara lelopean.