Goizeko panoramaren antzekoa zegoen Hernanin atzo iluntzean, Kornikako erredakzioa ixtean: Portu eta Karabel arteko bidea itxita, AMR parean Astigarragarako bidea itxita, eta Fagollagan bidea itxita.
Añarbeko presa ireki egin behar izan zenez, aurreikuspenen arabera ur mailak metro erdi egingo zuen gora, baina Andoni Pikabea udaltzainburuaren esanetan, «espero baino gutxiago igo da ura, zorionez. Arratsaldean prezipitazioa apenas egin du, eta horrek lagundu egin dio Urumeari eusten. 2,8 eta 2,9 metro gainditzera ez da iritsi ura. Hala ere, alerta gorria eguerdira arte mantendu beharko dugu. Baina pentsatzen dugu ez dela gehiagora joango».
Egoera mantendu
Eguerdi partean, Añarbe ura askatzen hasitakoan espero zen ur maila igotzea. Baina azkenean, ondorioak ez ziren hainbestekoak izan. «Karabelen antzeko mantendu da ur maila; ez da sotoetan sartu», azaldu zuen Pikabeak.
Gauzak horrela, iluntzean antzekoa zen egoera: errepidea moztuta zegoen Fagollagan, Karabel eta Portu artean eta AMR parean, Astigarragara bidean. Osiñagako bidea, berriz, irekita zegoen.
Urumea bailaran ere, ez zen aldaketa haundirik izan: Astigarragan, Ergobia eta Galtzaur erreka ingurua zeuden urak hartuta; Aranon Abaño inguruko errepidea zegoen moztuta, eta Goizuetara dijoan errepidea ere itxita zegoen.
«Pentsatzen dugu ez dela gehiagora joango»
Ereñotzun ere, ibaiari begira
Bi puntu hartu zituen urak atzo Ereñotzun. Batetik, Bordatxo merenderoa. Bestalde, Ereñotzu sarreran dagoen Gorrotxategi etxeko bajera, zertxobait. Fagollagan ere atera zen ura, eta egin zen putzua bajera batzuetan, baina ez zen jatetxera iritsi.
Bestalde, Txirrita eskola itxi egin behar izan zuten, badaezpada, eta gaur erabakiko dute ireki ala ez.
Auzo udaletik Amaia Minerrek azaldutakoaren arabera, «mailarik altuena eguerdian hartu du urak, Añarbe ura botatzen hasi denean. Abaila haundian zetorren. Baina Usokoerrekan ez da urik atera, eta Epelerrekaren maila, menditik datorrena, dezente jaitsi da. Mantendu egin da maila, gutxi-gorabehera».
Lur-jausi bat ere izan zen Latxe inguruan, baina bidea irekita egon zen.
Lanak errazte aldera, errumaniarrak Hernanin
Hernaniko udaltzainburuak jakinarazi zuen Astigarragara mugitutako errumaniarrak ere Hernanira ekarri zituztela atzo. «Gabriel Zelaian daude denak. Izan ere, Foru Aldundiarekin elkarlanean aritzeko, mantak eta janaria ekartzeko, errazagoa da denak elkarrekin badaude. Seguru asko astelehenera arte bertan egon beharko dute, eta orduan ikusiko da nola gelditu den kanpamenduen ingurua, eta zer egin».
Aldaketa gutxi, datozen orduetan
Gaur goizean zehar oraindik ere euria egingo du. Baina atzo arratsalderako Añarbek jaitsi egin zuen ur emaria, eta badirudi egoera ez dela larrituko. Hala ere, alerta gorria eguerdira arte luzatu dute.