Bideokamarak jarriko dituzte hondakin bilketarako larrialdi guneetan, hondakinak kontrolik gabe botatzea saihesteko. Hala onartu zuen Udaleko Plenoak asteartean, Gobernu Taldearen aldeko botoekin, eta EAJ eta PSE-EEren kontrakoekin. Jakinarazi dute, puntu horietan obra hondakinak azaltzen direla, edozein modutara utzita, eta arriskutsuak direla herritarrentzat.
Etxeko hondakinentzat dira larrialdi guneak, eta bestelakoak botatzea saihestu nahi dute kamarak jarriz.
Bestalde, Plenoak hasierako onarpena eman zion Hondakinak bildu eta tratatzeko Ordenantzaren aldaketari. 2010ekoa da ordenantza, eta ordutik, hainbat moldaketa egin dira. Horiek Ordenantzan txertatzea onartu zuten asteartean. Kontra bozkatu zuten EAJk eta PSE-EEk, zenbait artikulu eta punturekin ados ez daudelako: «isunak gehiegizkoak iruditzen zaizkigu», azaldu zuen Andoni Amonarraizek, EAJren bozeramaileak.
Mailegua emango dio Udalak Ereñotzuri, ur zikinak jasotzeko proiektuaren bigarren faseari ekiteko.
Ereñotzuri mailegua, ur zikinen proiektuaren bigarren faserako
Ereñotzuko Auzo Udalari mailegua ematea ere onartu zuen Udalak, aho batez, 2016ko aurrekontuaren kontura. Horrekin, Auzo Udalak martxan jarriko du bigarren fasea, ur zikinak jasotzeko proiektuan.
Bi Ordenantza Fiskal aldatzea ere onartu zuten aho batez: zerbitzu publikoak eskaintzeagatik ordaindu beharreko Tasena eta Prezio Publikoena. Dena den, tasak eta prezio publikoak berdin mantenduko dira.
Udala, Goiener Kooperatibako bazkide
Goiener Kooperatibako bazkide-laguntzaile izango da Hernaniko Udala, Plenoak hala onartu baitzuen aho batez. «Energia berriztagarriak komertzializatzen dituen kooperatiba bat da, irabazi asmorik gabekoa», azaldu zuen Aitor Miner Ogasun zinegotziak.