Jose Maria Setien gotzain emeritua Hernanin izango da gaur, hitzaldia emateko. Ganbo Iturrik du saioa, Elkarbizi programaren barruan; eta hain justu, elkarbizitzaren oinarriez ariko da Setien: Elkarrekin bakean bizi, gaur-hemen. Biteri kultur etxean izango da, iluntzeko 19:00etan hasita.
Irekia izango da, eta Elkarbizi taldeak herritar guztiei luzatu die gonbitea, gotzain hernaniarraren hitzaldia entzuteko.
Elkarbizitzarako irizpideak zehaztea helburu
Elkarbizitzaren zoru etikoa eraikitzeko asmoz jarri dute martxan Elkarbizi programa, eta hortik abiatuta, elkarbizitzarako irizpideak zehazteko.
Asmo horrekin, bost ekitaldi antolatu dituzte, eta aurrenekoa izango da Setienen hitzaldia. Gotzainak idatzitako pasarte batzuk ekarri dituzte gogora antolatzaileek: «esan ohi dugu, arrazoi osoz esan ere, guztiok dugula bakean bizitzeko eskubidea. Baina bake hori ez zaigu, euria bezala, zerutik eroriko; aldiz, guztion artean eraiki beharko dugu». Gisa horretako hausnarketak jarriko ditu mahai gainean Setienek, gaur.