Andoni Gartzia alkateak prentsaurrekoa eman zuen atzo. 2015eko aurrekontu parte hartzaileen ekimena aurkeztu zuen. Iaz bezala, 100.000 euro zertan inbertitu proposatzeko eta erabakitzeko aukera izango dute herritarrek.
Orain, ekimenaren 1go faseari emango zaio hasiera eta herritarrek Udal eraikinetan (udaletxean, kiroldegian, kultur etxean eta KZ Gunean) eta zenbait komertziotan (Ogi Berrin, Anuskan, eta Ikatza, Kaizoku eta Estanco tabernetan) izango dituzte buzoiak proposamenak uzteko. Horretarako, etxean jaso edo buzoien gainean aurkituko dituzte triptikoak. «Bakoitzak herri ikuspegi ezberdina dugu eta horren arabera gure lehentasunak arlo batean edo bestean kokatzen ditugu. Beraz animatu eta egin zure ekarpena!», egin du dei alkateak. Proposamenak entregatzeko azken eguna martxoaren 8a izango da.
Ondoren Udalak aurkeztutako proiektuen bideragarritasun ekonomiko eta teknikoa aztertuko du eta azken fasera pasako direnak aukeratuko ditu. Azken fasean, herri galdeketa egingo da.
«Oraingoan ere, eskatutakoa egingo du Udalak»
Iaz egin zen lehenengo aldiz ekimen hau eta harrera oso ona izan zuela nabarmendu zuen alkateak: «Batetik, herritarrek lehenengo aldiz zuzenean hartu zutelako parte Udal erabakien prozedura osoan. Eta bestetik, Udalak emandako hitzari eutsi ziolako. Herriak Ikastolarako aterpea eskatu zion Udalari eta aterpea eraikita dago. Hasieratik bukaerara errepikatuko dugu oraingoan ere, herritarrek erabaki eta eskatutakoa egingo du Udalak».
Ziur daude aurten ere harrera positiboa izango duela ekimenak eta espero dute iazko parte hartzea gainditzea.
Aurtengoak, inoizko aurrekontu partehartzaileenak izango direla ere azpimarratu zuen alkateak: «Herritarrek Udal gaietan geroz eta partehartze haundiagoa izatea ahalbidetzen ari gara, eta etorkizunean ere hala izango da, laster indarrean sartuko baita parte hartze ordenantza. Eta ordenantza oraindik indarrean ez badago ere, Udala horren arabera ari da lanean dagoeneko. Auzo ezberdinetan 9 bilera egin ditugu eta herritarren ekarpen asko aurrekontuan sartu ditugu».