Astigarragako Kronika urtea betetzear da. Iazko otsailaren 26an argitaratu zen 0 alea eta martxoarekin batera, Urumeako Kronika ere martxan jarri zen. Ale hartan azaldu bezala, ezinbestekotzat jotzen zen herritarren, taldeen eta instituzioen laguntza Kronika aurrera ateratzeko, eta urte honetan zehar, halaxe izan da. Hori horrela, Kronikak eskerrak eman nahi dizkie guztiei eta elkarlanean segitzera gonbidatu: informazioa pasatzen, gertaeren berri ematen, elkarrizketak proposatzen, publizitatea egiten, Kronika banatzen eta zabaltzen...
Ahalik eta gehien zabaldu
Proiektua sendotzen doa pixkanaka Astigarragan eta Kronikaren helburua da hobetzen jarraitzea (horretarako berrantolaketa egin du lantaldeak). Herritar gehiagorengana iristea ere bada erronka. Egun, 700 aleko tirada dauka Astigarragako Kronikak.
Astigarragako eta Urumeako berriak, euskeraz eta doan
Astigarragako Kronika asteazkenero argitaratzen da, paperean. Gainerako egunkariak banatzen diren puntuetan egoten da eta debalde da. Astigarraga eta astigartarren berri ematen du, euskera hutsean.
Eta larunbatetan, Urumeako Kronika argitaratzen da. Astigarragak bere tartea du beti, Urumeako goiko bailarako herriekin batera: Hernani, Ereñotzu, Arano eta Goizuetarekin. Interneten (www.kronika.eus) eta sare sozialetan ere (@KronikaEus) bada Kronika.