Zita bikoitza jarri du Hernaniko Gure Esku Dagok, larunbat honetan. Goizean, hitzaldia izango da Biterin, 11:00etan; eta bazkaria egingo dute ondoren, Errioguardan.
Bi izango dira hizlariak, biak ere kanpotik etorriak: Gillian Martin eskoziarra eta Alfons Bach kataluniarra. Aberdeeneko Independentziaren Aldeko Emakume taldearen buru da Martin, eta Eskoziatik etorriko da Hernanira, independentziari buruz hitz egitera. Alfons Bach, bere aldetik, Kataluniako Asanblea Nacional Catalana eta Esquerra pel si, si taldeen ordezkari da.
Saregileen arteko lotura sendotzeko, bazkaria
Hitzaldiaren ondoren, bazkaria ere antolatu du Gure Esku Dagok. Errioguardan egingo dute, saregileen arteko lotura sendotzeko: «helburua da lantalde ezberdinetan eta sarean zaudeten herritarrek elkar gehiago ezagutzea eta elkarrekin harremanak sortzen laguntzea. Guretzat oso inportantea da», azaldu dute.
Izenematea zabalik, eta 60 lagunentzat tokia
Bertan bazkaldu nahi dutenek, aurrez eman behar dute izena. Horretarako, bi bide jarri dituzte: whatsapp bidez mezua bidali 610 044 001 telefonora; edo idatzi posta elektronikoz hernanigureeskudago@gmail.com helbidera. 60 lagunentzako dago tokia, eta ahalik eta azkarren apuntatzea gomendatu dute, lekurik gabe ez geratzeko. Menua 22 euro izango dira, kafea barne. Animatzeko dei egin diete herritarrei.