Aurten, bederatzigarren aldiz, sagardotegietan barrena lasterketa antolatu da. Larunbatean egingo da Sagar Lasterra herri lasterketa. Goizeko 11:00etan hasiko da Hernaniko Arraun Elkarte paretik (Ibarluze industrialdea), eta ondorengo sagardotegietan barrena pasako da: Goiko-Lastola, Elorrabi, Iparragirre, Altzueta, Otsua-enea, Olaizola eta Itxas Buru. Handik, Portu, Karabel, Florida, Sagastialde eta Latsunbetik pasa beharko da, eta kiroldegian bukatuko da 8.900 metroko ibilbidea.
Izenematea, ostiralera arte
Ostiralean bukatuko da lasterketan parte hartzeko izenemate epea. www.kirolprobak.com webgunean egin behar da: txip horia dutenek, 9 euro; alokairuzko txiparekin, 11 euro; eta egunean bertan, 16.
600 korrikalarirentzako dago tokia, eta 16 urtetik gora eduki behar dira parte hartu ahal izateko.
Irteera puntura, autobusak
Urtero bezala, aurten ere autobusa jarriko da, doan, kiroldegitik irteera puntura joan ahal izateko, 10:10etan eta 10:30etan. Lasterketa bukatuta, kiroldegian dutxatzeko aukera izango da, eta sariak banatu eta zozketatuko dira.