«Gure kaleetan emakume errealen izenik ez dagoelako, poz-pozik gaude, azkenean, Andre Kalea berreskuratu dugulako», azaldu zuten atzo Berdintasun Kontseiluko kideek. «Izena duena bada».
Hain zuzen, atzoz geroztik, Urumea edo Kardaberaz kalea izenarekin ezagututakoa, Andre Kalea da, ofizialki. Inaugurazio festa egin zuten atzo bertan bildutako herritarrek. Plaka berria belaunaldi ezberdinetako emakumeek inauguratu zuten. Segidan, Maialen Lujanbio, Eli Pagola eta Eizagirre ahizpak aritu ziren bertsotan, eta, ondoren, herritarrek lagundu zieten, Joxepa Mateo zenaren bertsoekin. Batukadak jarraitu zuen festaren burrundarekin, eta pintxo-potearekin bukatu zen ospakizuna.