Txokolatezko brownieak, domino gailetak eta eguzkilore bat egiteko zita zuten atzo, Mintzalagun ekimenean dabiltzan astigartarrek. Gozogintza tailerra aitzakia zen, ordea, elkartu eta euskera praktikatzeko. Urte asko dira Astigarragako AEKk Mintzalagun ekimena martxan jarri zuela. Helburu nagusia da euskeraz ondo dakien bat eta justu xamar hitz egiten duen bat elkartzea, praktikatzeko. Azken urtean 3-4 pertsonako taldeak osatu dituzte, eta 40-50 lagun inguru elkartzen dira, astero.
«Aberasgarria da»
Jose Luis eta Beatriz dira, Mintzalagun ekimenean dabiltzan bi lagun. Jose Luisek lau urte damazki AEKn ikasten, eta dio: «mintzalagun ekimena aukera ederra izaten ari da klaseetan ikasitakoa praktikan jartzeko». Beatriz da euskaldun zaharra, eta berarentzat ere «oso aberasgarria» izaten ari dela dio.