Bigarren Herri Asanblada deitu zuen atzo Podemos Hernani Ahal Duguk. Azaldu zuen udal hauteskundeetan ez dela alderdi politiko bezala aurkeztuko. «Plataforma herritarrak bultzatu nahi ditugu, erakundeak herritarren zerbitzura egon daitezen», azaldu zuten.
500 sinaduraren beharra
Herri plataforma hori sortzeko babesa izateko, eta Hernanin 20.000 biztanle inguru daudela kontuan hartuta, 500 sinadura bildu behar dira, hauteskunde araudiaren arabera. Sinadura bilketa egingo da martxoaren 31tik apirilaren 20ra bitartean. Horretarako zerrendak jarriko dituzte, eta sinadurarekin batean NANaren fotokopia eman beharko da.
Babesa lortu ondoren, hautagaien aukeraketa
Sinadura bilketa hasi baino lehen, Podemos Hernani Ahal Duguko lan batzordea harremanetan jarriko da herriko eragileekin, herriko beharrak identifikatzeko eta pixkanaka hauteskundeetarako programa osatzeko.
Bestalde, nahikoa sinadura biltzean, hautagaiak aukeratzeko primarioak egingo dira. Edonork aurkeztu ahal izango du bere burua hautagai izateko apirilaren 15etik 20ra, Podemosekoa izan edo ez, eta zerrendako edonor bozkatu ahal izango da, ordena edozein dela ere. Emaitzak apirilaren 27an jakingo dira.
Informazio gehiago: http:// hernani.ahaldugu.eus edo podemos.hernani@gmail.com.