Maialen trainerua Oriako uretan ikusteko aukera izango da gaur. Lehenengo traineru estropada jokatuko dute Hernaniko neskek. Hain zuzen, Oriaren Traineru Jaitsiera jokatuko da gaur, 16:30etan hasita. Eta zehazki, bi taldetan hartuko dute parte hernaniarrek: Hernani-Iparragirre Sagardotegia taldean, Maialen traineruarekin, eta Hernani-Betulo taldean, Tarragonako arraunlariekin (iaz ere, Gure Esku Dago taldea osatu zuten biek, Orioko jaitsieran). Denera, 1.150 arraunlari eta 85 ontzi ariko dira leihan, maila desberdinetan, emakume zein gizon. Erakustaldi bat bada ere, saltsa ederra sortu ohi da beti, denboraldiari begira taldeak nola datozen ikusteko aukera izaten baita.
Kronikako webgunean zuzenean jarraitu ahal izango da estropada, eguraldia lagun.
«Estropada txukuna egitea da helburua»
Hernaniko neskentzat aurreneko traineru estropada izango da eta Juanjo Etxarte entrenatzaileak argi du festa bat izango dela, beste ezer baino: «Hasi berriak gara eta ez goaz marka bat egitera. Ez diogu postuari begiratuko. Estropada txukun bat egitea da helburua eta arraunlariek ikustea zer den traineru estropada bat. Gehienak, gazteak eta inoiz ibili gabeak dira».
Nesken estropada Saikolatik abiatuta izango da. Hernani-Betulo 17:11etan aterako da eta Hernani-Iparragirre sagardotegia 17:16etan.
Euria aldeko izan liteke
Eguraldi kaxkarra dago iragarria gaurko: haizea eta euria. Euriak mesede pixka bat egin dezakeela dio Etxartek: «Euriaren eraginez, korronte gehiago sortu daiteke eta gure ordua kontuan hartuta, mesede pixka bat egin dezake, korrontea hartuz gero».
Hernani-Betulo, 17:11etan abiatuko da, eta Hernani-Iparragirre sagardotegia 17:16etan.
6 llagut, 6 llaut eta 77 traineru
Traineru estropadaz gain, Kataluniako llaguten eta Mediterraneoko llauten estropadak ere jokatuko dira; seina talde izango dira lehian. Horiek hasiko dira eta ondoren traineruen txanda izango da. Jubenilak hasiko dira eta atzetik, beteranoek eta neskek jarraituko dute. Horiek denek 4.000 metroko estropada jokatuko dute eta Saikolatik abiatuko dira. Nesken ostean, gizonezko absoluto mailako traineruak ariko dira. 6.000 metroko estropada egin beharko dute, Mapiletik abiatuta (Aginaga). 17:15etan hasiko dira.
Babyautoko lehenengo bandera jokoan
Nesken artean, 13 traineru aterako dira, orden honetan: 17:09etan Oiartzungo Itsaslapurrak, 17:10etan Badalona, 17:11etan Hernani-Betulo, 17:12etan Campello, 17:13etan Dania Alicante, 17:14etan Colindres, 17:15etan Santoña, 17:16etan Hernani-Iparragirre Sagardotegia, 17:17etan Zarautz-Getaria, 17:18etan Zumaia, 17:19etan Hibaika, 17:20etan San Juan eta 17:21etan Orio Babyauto. Hain zuzen, Babyauto I. Bandera izango dute jokoan.
Batelak, bihar
Gipuzkoako Batel Ligaren txanda izango da bihar. Liga, berez, urtarrilean hastekoa zen, baina jardunaldi guztiak bertan behera utzi behar izan zituzten. Bihar, 10:30etan hasiko dira estropadak Pasai Donibanen, eta bertan izango dira maila guztietako Hernaniko batelak.