Hiru egunez, mozorroen uholdea izan zen Astigarragan, aurreko asteburuan. Ostiraletik igandera ospatu zituzten Inauteriak herrian, eta eguraldia kaxkarra izanda ere, ederki pasa zuten haur, gazte eta helduek.
Txikienak izan ziren mozorrotzen aurrenekoak, eta ostiralean bertan, kolorez jantzi zuten eguraldi grisa. Larunbatean, berriz, gorputza mugitzeko aukera paregabea izan zuten, Mugi-Mugi diskotekarekin. Dantza eta jolasa, biak uztartu zituzten!
Arratsaldean izan zen hori, baina musika goizetik entzun zen herriko kaleetan, txaranga ibili baitzen kaleak alaitzen.
Euskal Inauterien konpartsa, igandean
Igandean izan zuen segida festak, Euskal Inauterien konpartsarekin. Dantza saioak eskaini zituzten herriko kale eta plazetan, eta frontoian.