Irati Zelaia, Maddi Aranburu eta Oihane Zalakain izan dira 400 euroko sariak jaso dituzten hernaniarrak, gidabaimena ateratzeko azterketa teorikoa euskeraz egitearen ordainetan. Gidabaimena Euskaraz egitasmoa 2010ean jarri zuten martxan Buruntzaldeako Udalek. Helburua da euskeraren erabilera zabaltzea, baita gidabaimena lortzeko azterketan ere.
Hori sustatzeko, azterketa euskeraz egin dutenen artean 400 euroko sariak banatzen dituzte Udalek; herri bakoitzean, dagoen autoeskola adina. Hernanin, 3 daude: Hernani, Otamendi eta Lagunak. Atzo banatu zituzten 3 sariak.
Bilakaera ona
Atzoko ekitaldian elkartu ziren, sarituez gain, Hernani autoeskolako Rafa Zulaika, Otamendiko Nekane Otamendi, udaletxeko euskera saileko Malores Etxeberria eta Luis Intxauspe alkatea.
Azken hauek azpimarratu zuten «bilakaera ikusita, emaitzarekin oso pozik» daudela. Izan ere, 2010ean egitasmoa martxan jarri zenean, Buruntzaldean 10 lagunek atera zuten gidabaimena euskeraz. 2014an berriz, 140 izan dira, eta horietatik, 56, hernaniarrak. Hernaniko autoeskoletan, berriz, 84 ikasle aritu dira euskeraz. Etorkizuneko erronka ere zehaztu zuten: «egitasmoa Gipuzkoan zabaldu eta normalizatzea».