Kaldereroek esango diete agur Astigarragako Inauteriei, larunbat honetan. Arratsaldeko 17:30etan abiatuko da konpartsa, Zipotza elkarteak antolatuta. Ergobian hasiko dute bere bidea Hungariako kaldereroek, kalez kale ibiltzeko, eta zartagien hotsez beteko dute herria, mailuekin kolpeka.
Beste herrietan Inauteriak iragartzen aritu ondoren, Astigarragara egingo dute azkeneko bisita, Hungariara bueltatu aurretik. Horregatik, Inauterien bukaera da Astigarragan iragarri ohi dutena, hasiera beharrean.
Jarraipena, aurreko asteburuko festari
Kaldereroen konpartsaren irteerarekin, jarraipena izango du aurreko asteburuko festak. Ostiralean hasi ziren Inauteriak, mozorroen desfilearekin, Herri Eskolako ikasleen eskutik. Larunbatean, Kalean txarangak alaitu zituen kaleak, eguerditik aurrera, eta gorputza mugitzeko aukera izan zuten haur eta gaztetxoek arratsaldean, Mugi Mugi diskotekarekin.
Eta igandean, Euskal Inauterien konpartsak hartu zuen txanda, Txirrisklako eta Musika Eskolako txistularien laguntzaz.