Jesus Mari Santos izango da EAJren hautagaia, Astigarragako alkate izateko. Santosen aldeko apustua egin dute jeltzaleek, maiatzaren 24ko Udal Hauteskundeetarako. Berarekin, «herritarren gehiengoaren babesa» lortuko duela uste du EAJk.
Jaiotzez da astigartarra Santos, eta 51 urte ditu. Ezkonduta dago eta 26 urteko alaba dauka: «aitatasunarena izan da bizitzak eman didan esperientziarik onena», dio. Delineatzaile tekniko izateko ikasi zuen, eta ordutik, familiaren altzari lantegi txikia zuzendu du, anaiarekin batera.
Santosek hitza eman du herritarren ondoan egongo dela, eta parte hartzea bultzatuko duela, «herriaren ongizatea bermatzeko».
Herrigintzarako grina, gaztetatik
EAJk nabarmentzen du, Santosek gaztetatik sentitu izan duela herrigintzarako grina: «horregatik erabaki zuen aurreko legealdian Astigarragaren alde lan egitea, politikaren alorretik».
Astigarraga Garbia plataformaren bozeramaile ere izan zen, Udalak atez atekoa ezarri zuen garaian: «benetan uste baitu horrelako ekimenak beste modu batera egin behar direla, hau da, beharrezkoa dela inposiziotik aldendu eta herritarra entzutea».
Interes berezia, landa eremuko gaiekin
EAJren zerrendaburuak «interes berezia» dauka landa eremuko gaiekin, «baserriko semea izanik». Uste du landa eremuko herriek protagonismo haundiagoa izan behar dutela, eta Udaletik hori defendatzeko konpromisoa hartu du. Gainera, hitza eman du herritarren ondoan egongo dela eta parte hartzea bultzatuko duela, «astigartarren arazoak konpondu eta herriaren ongizatea bermatzeko».
Kirola du zaletasun haundiena, eta Realaren «jarraitzaile sutsua» da. Betidanik egon da herri kirolei lotuta, eta hainbat txapelketa eta ekimen antolatu izan ditu, boloetan eta tokan, esaterako. Oso gustoko ditu zinemara joatea eta lagunekin egotea ere.