Hernaniko PSE-EE alderdiak eskerrak eman nahi dizkie hernaniarrei hauteskunde programa osatzeko egin dituzten proposamenengatik. Kronikara bidalitako prentsa oharrean, hala diote: «Casa del pueblon pozik gaude iniziatibak izan duen harrerarekin. 60 proposamen baino gehiago jaso ditugu, eta honek ondo erakusten du Hernanin parte hartzeko dagoen ohitura. Ez genuen hainbeste proposamen jasotzea espero, bi arrazoiengatik: batetik, hainbeste urteetan jasan den presio sozialagatik; eta bestetik, gaur egun herritarrek politikarekiko duten desilusioagatik».
«Proposamenen artean atez atekoaren inguruko asko errepikatu dira»
«Proposamen asko errepikatu dira»
Ricardo Crespo hautagaiaren esanetan, proposamen asko errepikatu dira: «asko atez atekoaren ingurukoak izan dira, eta jaso diren 6.000 sinaduren ingurukoak. Horrek erakusten du herritarrek oso presente dutela atez atekoaren arazoa. Guk konpromisoa hartu dugu atez atekoaren inguruko botazioa egiteko».
Trafikoaren inguruko proposamenak ere, jaso dituztela dio Crespok: «trafikoa izan da, baita ere, beste proposamen batzuen gaia. Era berean, gardentasuna, Udalean parte hartzea eta autobus lineen aldaketak izan dituzte hizpide».
Beste hainbat proposamen ere jaso dituzte, nahiz eta Cresporen esanetan, hauek ez diren hainbeste errepikatu: «Gay Murreko patioa estaltzeko proposamena jaso dugu. Eta baita ere, gune berdeen ingurukoa, txakurrek lasai ibiltzeko aukera izan dezaten eskatuz». Crespok oharrean azaldu duenez, guztiak jasoko dituzte hauteskunde programan.
Eta sugerentziez gain, kejak ere jaso dituztela dio Crespok: «hernaniarrek bizi duten langabezi egoeraz kejatu dira asko. Honen inguruan Udalak ez du maniobrarako aukera askorik. Hala ere, ahal den neurrian, enpresa berrien alde egingo dugu lana, eta Pyme eta autonomoentzako laguntzak bilatuko ditugu. Lagungarri izango zaizkien neurri fiskalak eta dirulaguntzak aztertuko ditugu, beti ere, herri mailakoak».