Hernaniko Liletak taldea besarkaden argazkiak biltzen ari da. Institutuko 30 ikaslek osatu dute taldea, eta helburua da, tratu txarrak jasaten dituen emakume bakoitzarentzat argazki bat lortzea. Gaur, San Valentin egunez, argazkiak biltzeko deialdi berezia egin dute, bat egin baitute VDay delakoarekin. Mundu mailan ekintza desberdinak antolatu ohi dira, emakumeenganako maitasuna eta errespetua adierazteko. Hernanin besarkadak jasoko dituzte: «maitasuna ez da gauza materialak oparituz adierazten; erasoekin bukatuta, bai ordea». Argazkiak ateratzeko txartel batzuk zabaldu dituzte, nahiz eta horiek gabe ere atera daitezken: «kontua da hausnartu, tarte bat hartu eta ateratzea». Lau modu daude bidaltzeko: #BilioiBatBesarkada traolarekin igo Facebook, Twitter edo Instagramera; edo emailez liletakhernani@gmail.com helbidera.