Badatoz! Hemen dira Inauteriak! Bihar motorrak berotzen hasiko dira gaztetxoenak, zahagi dantzarekin. Arratsaldeko 17:00etan eginen dute dantza erakustaldia, eta arratsaldeko 18:00etan dantzaldia izanen da.
Ondoren, gaueko 21:30etan, afaritarako elkartuko dira Mozorroak. Izan ere, hurrengo bi egunetarako indarrak bildu beharko dituzte.
Mozorroen puska biltzea, baserrietan eta kalean
Urtero bezala, aurten ere Mozorroak puska biltzen ibiliko dira. Astelehenean Urumea ibaiaren bi aldeetako baserrietan barrena ibiltzen dira, bi taldetan banatuta, eta asteartean, herriko etxeetan egiten dute eskea, goizez, etxe bakoitzean fandangoa dantzatuta. Arratsaldean, berriz, zahagi dantza egiten dute.
Aurtengoan eutsi eginen diete ohiturei, ez dira eta makalak, eskean lortzen dituzten premioak!
Brasilgo berotasuna, Goizuetan
Astelehenean, bestalde, bisitari bereziak etorriko dira Goizuetara. Aurreko urtean mundu osoko piratak bildu ziren herrian, eta aurten, Brasilgo bisitariak etorriko dira. Negu hotzari aurre egiteko adina berotasun ekarriko dute, seguru, eta erritmo eta musika gozoa izanen dituzte lagun.
Goizeko 10:00etan plaza apaintzen hasiko dira, behar bezalako ongi etorria egiteko, eta hamaiketakoaren ondoren, brasildarren konpartsak girotuko ditu kaleak.
Gero, bazkaria eginen dute, bai gaztetxoek, eta baita helduek ere. Helduek bazkaldu bitartean, gainera, gaztetxoentzako tailerrak eginen dira Goxalin, eta pelikula botako dute Gazte Txokoan.
Arratsaldean, berriz, Mozorroak iritsiko dira herrira, baserrietan barrenako puska biltzea bukatuta. Segidan, 19:00ak inguruan, dantzaldia izanen da, eta bukatzean, afaritarako elkartuko dira Mozorroak, hurrengo eguna indarrez hasteko.
Bihar hasiko dira Karnabalak, eta datorren larunbatean festa izanen da oraindik, herrian.
Erromeria eta disfraz lehiaketa
Mozorroek, zahagi dantzak eta karrozek duten bezainbesteko garrantzia hartzen du Inauerietan musikak. Biharko eta asteleheneko dantzaldiaz gain, asteartean erromerian dantzan aritzeko aukera paregabea izanen da, Gugaz taldearekin, 19:00etan eta 23:30etan.
Bestalde, karrozak desfilean aterako dira asteartean bertan, iluntzeko 20:00etan, eta gaueko ordu txikietan disfraz lehiaketa eginen da Gaztetxean. Bada garaia disfrazak kajoietik ateratzeko!
Hurrengo larunbatean, gehiago
Karnabalak asteartean bukatuko dira toki askotan, baina ez Goizuetan! Datorren larunbatean oraindik ere izanen da zerekin gozatua.
Batetik, txaranga ibiliko da herrian barrena, eguerdiko poteoan. Ondoren, Mozorroek beste bazkari bat eginen dute, eta poteoarekin segi arratsaldean. Eta gauean, kontzertua: Los Webotes!
KARNABALETAKO EGITARAUA
Bihar
17:00 Gaztetxoen zahagi dantza.
18:30 Dantzaldia.
21:30 Mozorroen afaria.
Otsailak 16, astelehena
08:00 Mozorroen irteera baserrietara.
10:00 Plaza apaintzera.
11:00 Hamaikeakoa.
Ondoren konpartsa herrian zehar (gaia:Brasil).
13:30 Umeen bazkaria.
14:00-16:30 Tailerrak Goxalin eta pelikula Gazte Txokoan.
14:30 Helduen bazkaria.
18:30 Mozorroen etorrera herrira dultzaineroekin.
19:00 Dantzaldia.
22:00 Mozorroen afaria.
Otsailak 17, asteartea
09:00 Mozorroen gosaria.
10:00 Mozorroak herriko kaleetan zehar.
14:00 Mozorroen bazkaria.
17:00 Zahagi dantza Izkiña tabernatik hasita.
19:00 Erromeria Gugaz taldearekin.
20:00 Karrozen desfilea.
22:00 Mozorroen afaria.
23:30 Erromeria Gugaz taldearekin.
02:00 Disfraz lehiaketa Gaztetxean.
Otsailak 21, larunbata
12:00 Poteoa Igandea txarangarekin.
14:00 Mozorroen bazkaria.
17:30 Poteoa Igandea txarangarekin.
Gauean Los Webotes gaztetxean.