Astigarragako herritar guztiak deitu ditu Gure Esku Dagok gaur egingo den bilerara azaltzeko. Arratsaldeko 19:30etan jarri dute zita, kultur etxean, datozen ekitaldien berri emateko.
Bilera irekia izango da, eta ordu erdi inguru iraungo duela aurreikusi dute. Bertan aurkeztuko dute, besteak beste, ekainaren 20an Euskal Herriko hiriburu guztietan egingo den festa erraldoia.
Hautestontziak josi
«Herritar guztion iritzi guztiak kontuan hartuz, denon artean etorkizun batean erabakitzeko balioko duen hautestontzia eraiki behar dugu, bakoitzaren kolorea kontuan hartuz», azaldu dute. Asmoa da hautestontzi horiek ekainaren 20rako eraikitzea, eta horretarako oihal zatiak josi beharko dira.
Oihal zati bakoitzak 20 zati txiki izango ditu, eta zati bakoitza atxikimendu bati lotuta egongo da. Atxikimendu hori emateko, euro bat ordaindu beharko da, eta paper bat bete, nork bere datuak emanez Gure Esku Dago ekimenaren sareko partaide izateko.
Gaur azalduko dute nola egingo den guztia.
Dokumentala, gaur zortzi
Otsailaren 18rako beste hitzordu bat ere zehaztu dute; Jostunak dokumentala jarriko dute, 19:00etan kultur etxean, doan. Iazko Giza Kateko irudiak biltzen ditu.