EH Bilduk aho batez onartu zuen herri batzarrean, Luis Intxauspe izatea zerrendaburua, datozen Udal Hauteskundeetan. Egungo alkateak adierazi zuen azken urte hauetako esperientzia oso aberasgarria izan dela alkate bezala, eta Hernani eta herritarren beharrak hobeto ezagutzeko balio izan diola. Lanean jarraitzeko motibatua eta gogotsu dagoela ere azpimarratu zuen: «Herritarrekiko harreman zuzenak eta eragile ezberdinekin elkarlanean aritzeak gure herria beste modu batera biziarazi nau eta honek asko motibatu nau aurrerantzean lanean jarraitzeko. Egun dudan ezagutzak, ikuspegiak eta bizipenak hurrengo legegintzaldian gogotsu jarraitzeko motibatu naute».
«Udal Irekiaren bidean jarraituko dugu, besteak beste»
Lau erronka nagusi
Hurrengo legegintzaldiko lan eta erronketako batzuk, oraingo lanaren jarraipena izango direla gaineratu zuen: «Eta nik proiektu hauetan lanean jarraitu nahi dut».
Erronketako bat, Hernaniri dagozkion erabakiak Udalak eta herritarrak elkarrekin lantzen eta erabakitzen jarraitzea izango da, Hernani erabaki lelopean: «parte hartze batzordean auzo elkarteekin batera lanean jarraituz; kirol federatuaren batzordean, jai batzordean, parekidetasun kontseiluan, kooperazio taldean, aurrekontu parte hartzaileak eginez...», argitu zuen Intxauspek.
Enplegua sustatzea eta garapen eredu berri bat lantzea ere izango da alkategaiaren beste erronka bat: «Krisi egoera honek behar haundiak sortu ditu eta laguntzak eta egitasmoak landu behar ditugu horretarako: enplegua sustatzeko egitasmoak (Innoforo eta Kooperatzen bezalako egitasmoak), eragile ekonomikoekin elkarlanean aritzea, eta garapen eredu berri bat lantzea; bertako eragileekin elkarlanean pertsona ardatz izango duen eredua, hernaniarron bizi baldintzak eta bizi kalitatea hobetzen lagunduko dutenak».
Horrez gain, herritarrengandik gertu egon nahi du eta harremanak erraztuz joan: «Udalaren modernizazio prozesuarekin jarraituko dugu eta Udal Irekiaren bidean eta gardentasunaren bidean sakontzen: HHZ udal bulego berria zabalduz eta zerbitzu telematikoak indartuz».
Eta beste erronka bat izango du memoria historikoa berreskuratzeko lanean jarraitzea: «Gure herrian hain krudelki bizi izan dugun historia landuz joango gara, gure memoria historikoa berreskuratuz, gertatutakoak eta bizitakoak jasoz, bake eta bizikidetzan aurrerapausoak eman ditzagun».
200 herritar lanean, programa osatzen
Hauteskundeetarako programa osatzeko, Hernaniko 200 herritar inguru lanean ari direla gaineratu zuen Intxauspek, Puntuz Puntu egitasmoan: «Programa herritar hau izango dugu ibilbide orria zinegotzi lan talde berriak; gogoz eta ilusioz, denon artean egiten ari garen lana baita: denon artean Hernani hobetzen ari garelako! ».