Euskal Herriko ia txoko guztiak zurituko dituela gaur iragarri du Euskalmetek eta Hernanin ere elurra egingo duela aurreikusi dute. Elur-kota 200-400 metro inguruan egongo da goizaldean, baina goizak aurrera egin ahala, 100 metrora jaitsiko da eta itsas mailara ere jaitsiko omen da. Hala ere, ez dela prezipitazio askorik izango azaldu dute.
Hotz haundia
Iparraldeko haizea bizi ibiliko da, bolada gogorrekin mendi inguruetan. Hotz haundia egingo du eta izotzarekin kontuz ibiltzeko ere gomendatu du Euskalmetek. 0-5 ºC artean ibiliko da tenperatura. Elur giroa eta hotza, ostiralera arte luzatuko da.
Gatza prest, behar izanez gero
Atzo Udaltzainburuarekin hitz egin zuen Kronikak eta normaltasuna zela nagusi azaldu zuen, eta lasai egoteko. Prebisioak gertutik jarraitzen ari dira eta gatza eta gainerako tresnak behar izanez gero, prest dituzte.
Ibaiaren emariari dagokionez, maila onean doala nabarmendu zuen eta Añarbe lekua egiteko aprobetxatzen ari dela.