Santa Ageda bezpera da gaur eta ohi bezala, santa eskean aterako dira Hernaniko hainbat talde. Gainera, santa eske bereziak ere izango dira gaurkoan. Izan ere, Ereñotzuko Ur Mia elkartekoak 50garren urteurrena ospatuko du eta Kantuz abesbatzarenak 25garrena. 16:30etan jarri dute hitzordua, Ereñotzun, eta Kantuzek 18:15etan, Milagrosan. Ohitura Zaharrak abesbatzakoak ere ordu eta leku berean geratu dira. Ikastetxeetako umeak ere aterako dira goizean. Eta baita goizuetarrak ere, 18:30etan.
Kantuzeko 75-80 kide
Kantuzek korokide ohiak gonbidatu ditu eta 75-80 lagun elkartzekoak dira, trikitixak lagunduta. Ibilbidea: Sandiusterri, Kide, Dori, Gudarien plaza, Andrekale (Tripontzi, Depor) eta Kale Nagusia (Onddi, Aralar, Rioja tabernak). Geldiune bakoitzerako, kopla bereziak prestatu dituzte. Santa eskea bukatu ondoren, autobusa hartu eta sagardotegira joango dira.