Normaltasunera bueltatzen ari da Urumea ibaia, ostiralean ateratzeko arriskua egon ondoren. Euri zaparradak eta kazkabarra bota zituen arren, behera egin zuen uraren mailak, eta 1,6 metro inguruan zegoen Ereñotzu parean, erredakzioa ixteko unean.
Atzo goizean atera zen alerta egoeratik, emaria 1,5 metrotik jaitsi zenean. Orduan, ur hustuketak egiteko aprobetxatu zuen Añarbek, prebentzio gisa, oraindik bete ez den arren. Lekua egin nahi izan dute, aurreikusita baitago euria egiten jarraituko duela, datozen egunetan. Hustuketekin jarraituko dute, emaria 1,75 metrora igotzen ez den bitartean.
Landare eta Zubipe, kaltetuak
Portu eta Karabelen neurriak hartu ziren arren, azkenean ibaia ez zen atera. Landare eta Zubipe zelaiak izan ziren, urak hartu zituen zonaldeak. Putzu haundiak daude, bereziki, errugbi zelaian.
Bestalde, Hernani eta Astigarraga arteko errumaniarren kanpamendua hustu zuten ostiralean, bizilagunak Gabriel Zelaiara eta Santiomendira eramateko. Baina egoera baretu zela ikusita, atzo goizean bueltatu ziren bertara.