Etxe hutsak alokairuan jartzeko, diru laguntzen orde-nantza onartu zuen Plenoak, abenduan. Hasierako onarpena eman zitzaion eta orain alegazioak aurkezteko aukera dago. Otsailaren 25era arte egongo da epea zabalik. Ondoren, Plenoak behin betiko onarpena emango dio. Ordenantza ikusgai dago Udaleko webgunean: www.astigarraga.eus.
Ordenantza honekin, Udalak lortu nahi du, Astigarragan gaur egun dauden etxe hutsak babes sozialeko alokairuan jartzea, eta horretarako diru laguntzak bideratuko dira etxe hutsen jabeentzat eta maizterrentzat. 50.000 euro bideratuko dira. Batetik, 32.500 euro bideratuko dira bere etxe hutsa alokatu nahi duten jabeentzat. Eta gainerako 17.500 euro, maizterrentzat izango da, errenta ordaintzeko. %50a modalitate orokorrera bideratuko da eta beste erdia, gazteentzako modalitatera.
Maizterrei dagokienez, astigartarrek ez lukete beren diru sarreren %30a baino gehiago bideratuko etxearen alokairura. Alokairu hauetara sarbidea izateko zenbait baldintza bete beharko dira, batik bat, ekonomikoak.
Gehienez, 550 edo 500 euro hilean
Betebeharreko hainbat baldintza honakoak dira: etxea Astigarragako udalerri barruan egon beharko da; Udal teknikariak tasatutako merkatu-errenta ezingo da izan hilean 550 eurotik gorakoa, etxebizitzak obrak behar ez dituenean, eta 500 eurotik gorakoa, etxebizitzak obrak behar baditu; egokitzeko beharrik ez duten etxebizitzek sukaldeko eta komuneko altzari garrantzitsuenak izan beharko dituzte edo diru laguntzak horretara bideratu (sukaldeko goiko eta beheko altzariak, sukaldea, garbigailua, hozkailua, komuna konketarekin, komunarekin eta dutxa edo bainuontziarekin); egokitzeko beharrik ez duten etxebizitzek itxura txukuna eta garbia izan beharko dute; etxebizitzek energia-eraginkortasuneko ziurtagiria izan beharko dute; diru laguntzak eskatu aurreko urtebetean inor bizi ez den etxebizitza hartuko da etxebizitza huts bezala…
Udalak obraren %75a beregain
Etxean obra egin behar izanez gero, Udalak obraren aurrekontuaren %75a hartuko luke bere gain, 6.000 euroko mugarekin.
Obrak egin behar dituztenek, eskabidea egin beharko dute Udalean eta etxebizitza zer egoeratan dagoen egiaztatuko dute Udaleko zerbitzu teknikoek, eta bizitzeko baldintzatan egoteko zer obra egin behar diren zehaztuko dute. Ondoren, Udalak eskatutako lan guztiak bilduko dituen aurrekontua aurkeztu beharko dute interesdunek. Alokairu kontratua indarrean jarri aurretik egin beharko dira obrak.
Lanak jabeak egin behar baditu, alokairuko kontratuaren epea, bost urtekoa izango da. Lanak maizterrak egin behar baditu, berriz, alokairuko epea obren kostuaren arabera kalkulatuko da, besteak beste. Hala ere, epe hori gutxienez bost urtekoa izango da, maizterrak hala erabakitzen badu.
Programan izena eman
Diru laguntza horiek jaso nahi dituzten jabeek, etxebizitza hutsak sustatzeko programan sartzea eskatu beharko dute, Astigarragako Udalak horretarako duen eredua aurkeztuz. Eredu hori udaletxean bertan eskuratzeko aukera izango da eta baita Udalaren web orrian ere.