Urtero bezala, iritsi da aurrematrikulazioa egiteko garaia, datorren ikasturteari begira. Hernani (Ereñotzu barne) eta Astigarragako ikastetxeetan astelehenean irekiko da epea eta Goizuetako eskolan, astebete beranduago, otsailaren 9an. Izena emateko azken eguna, berriz, otsailaren 13a izango da, kasu guztietan. Batez ere, Haur Hezkuntza (2 urte) eta Bigarren Hezkuntza (12 urte) hasi behar dutenak daude matrikula egitera deituta. Hernani eta Ereñotzun, 390 ume eta gazte dira adin horretakoak. Astigarragan 72 plaza dituzte 2013an jaiotakoentzako eta Goizuetako eskolan 5-6 ume matrikulatuko dira. Goizuetan, aurten 3 urte betetzen dituztenak hasten dira eskolan, 2012koak.
Aukera zabala Hernanin, maila guztietan
Haur Hezkuntza eta Lehen Hezkuntza egin behar dutenek (2-12 urtekoak), bost ikastetxe dauzkate aukeran, Hernanin: Txirrita (Ereñotzu), Elizatxo, Urumea, Langile eta Inmakulada. Ereñotzuko Txirrita eskola txikiak 56 ume ditu gaur egun eta matrikulazioaren arabera osatzen da. Horrez gain, eskola txikia denez, bateratu egiten dira mailak.
Elizatxo eta Urumea ikastolak bi lineatakoak dira, hau da, maila bakoitzeko bi gela dauzkate eta adinaren arabera, ratio desberdinak izaten dira gela bakoitzean, alegia, haur kopuru desberdina. Hori horrela, 2 urtekoen mailan, gehienez, 36 haur egongo dira (18na gela bakoitzean), Haur Hezkuntzan (3-5 urte), 138 haur (23na), eta Lehen Hezkuntzan (6-11 urte), 300 haur (25na).
Langile ikastola, berriz, hiru lineatakoa da; maila bakoitzean hiru gela daude. Baina urte batzutan, lau lineatakoa izan da, beraz, gaur egun Lehen Hezkuntzako 4, 5 eta 6garren mailan lau gela mantentzen dira. Hori kontuan izanda, 2 urtekoen mailan, 54 ume egon litezke, gehienez, Haur Hezkuntzan (3-5 urte), 207 ume, Lehen Hezkuntzako 1, 2 eta 3garren mailatan (6-8 urte), 225 haur eta Lehen Hezkuntzako 4, 5 eta 6garren mailatan (9-11 urte), 300 haur.
Inmakuladak, berriz, linea bakarra du: 2 urtekoen mailan, 18 ume; Haur Hezkuntzan, 69 ume; eta Lehen Hezkuntzan, 150 ume.
DBHrako ere, aukera Hernanin
Derrigorrezko Bigarren Hezkuntza egiteko ere, aukera dago Hernanin. Bi ikastetxe daude: Inmakulada eta Hernani BHI Institutua. DBH egiteko aukera izateaz gain, Batxilergoa eta Heziketa Zikloak ere egin daitezke ikastetxe hauetan. Eta HLPP ere bai, Transpacarren.
Hernaniko Udalak nabarmendu du herriko ikastetxeetan ikasteak duen garrantzia.
Kalitatezko eskaintza eta abantaila asko
Hernaniko Udalak argi dauka herriko ikastetxeetan ikasteak abantaila asko dituela eta kalitatezko eskaintza dagoela azpimarratu du: «Euskaldunak eta eleanitzak dira, parte hartzaileak, herrian txertatuak, integratzaileak, herriko eskolen arteko elkarlana bultzatzen dutenak, ingurumena zaintzen dutenak...». Eta abantailak, honakoak: «Merkeagoa da, oinez edo bizikletaz joateko aukera dago; erosoagoa da, denbora gutxiago behar da joan-etorrian; seme-alaben heziketa hurbiletik segitu daiteke; aberasgarria da herriarentzat...».
Astigarragan, lau gela irekitzeko baimena
Astigarragako Herri Eskolan, Haur Hezkuntza eta Lehen Hezkuntza egiteko aukera dago. Azaldu dutenez, lau gela irekitzeko baimena dute, hau da, 72 plaza dituzte, 2013an jaiotakoentzat. Denera, 80 ume jaio ziren 2013an. DBH, berriz, Martutenen, Arantzazuko Ama Ikastolan egiteko aukera dago, besteak beste.
Hezkuntza estilo propioa, Astigarragan
Astigarragako eskolan, hezkuntza estilo propioa dutela nabarmendu dute: «Euskera eta euskal kulturarekin konprometitua, elkarren errespetuan hezten duen eskola, ikasleekin banakako arreta, irakasleen etengabeko prestakuntza, gurasoen partaidetza aktiboa, kudeaketa demokratikoa...».
3 urtetik 13ra, Goizuetan
Goizuetako Xalto eskolan, eskaintza desberdina da. Ikastetxe honetan, 3 urtetik 13 urte bitarteko ikasleak daude, hau da, Haur Hezkuntzako bigarren ziklotik DBHko 2garren mailara arte.
Ia 4.000 ume eta gazte, bailarako ikastetxeetan
Maila guztiak eta herri guztietako ikastetxeak kontuan hartuta, 3.914 ume eta gazte ari dira gaur egun, bailarako ikastetxeetan ikasten. Hernaniri dagokionez: Haurreskolan, 67 ume; Inmakuladan, 314; Elizatxon, 412; Langilen, 776; Urumean, 454; Institutuan, 940; HLPP-Transpacarren, 30; eta HHI-CEPAn, 245. Ereñotzun, berriz, 56 ume dabiltza Txirritan; Astigarragako Herri Eskolan 542 ume; eta Goizuetan, 78 ikasle daude: 61 ikasle goizuetarrak dira eta 17, aranoarrak.